Priticheam firgozkaramno,

    Hea mhoinneant amchea dhormacheo tin mukhi ani mhotvacheo vhoddleo porbo ami somrombhtanv. Terever, Jezuchea Sorg-Provesachi (Ascension) dhobajean porob kortanv zalear, visver Povitr Atmeachi ani uprant satavisver Povitr Tritvechi porob somrombhtanv. Ho ekuch Dev teg zonnamnim thavo zata. Povitr Tritvecho Gutt, mukhi gutt amchea dhormacho. Ekuch Dev punn Teg Zonn.

    Dhormdutancho Itihas amkam sangta ki Jezu punorjivont zatoch, sorgar choddche adim xisank/dhormdutank challis dis jivo dixtti poddun, Apnnakuch jivo dakholl korta ani Devachea Rajeavixim To tanche kodde uloita. Punorjivontponnache ghoddier Kristachi Kudd mhoimevont/onodvont zata (Lk. 24:31) Punn team challis disamnim jednam To khata ani pieta, xisam sangata bhavponn onnbhovta ani rajeavixim xikonn dita tednam Tacho onod/mhoima chaltea monxeaponnachea disnnea khal lipon urta (Acts 1:3, 10:41) Jednam Tachem monxeponn Devachea/Deivik mhoiment bhitor sorta tednam Tachem nimannem disnnem sompta, kupam sangata to sorgar choddta, zhoim To Bapachea uzvea hatak bhosla.

   Katolk Dotornichem novem pustok amkam sorgavixim oxem sangta. Deva thaim ani Kristant asul’leam soglleam thaim bhagi ekcharacho gutt amkam somzonam. Povitr Pustok khunnamnim vo rupkaramnim sorgachi khobor korta: he rupkar vo khunna mhunnlear jivit, uzvadd, xanti, lognachi porob, rajeacho soro, bapaichem ghor, sorginchem Jeruzalem, voikutt (ccc no. 1027).

   Aplea punorjivontponnachea vellar, Jezun Maria Magdalenak aplea Sorg-Provesachi (sorgar choddnneachi, khobor sangli tednam Tannem oxem mhunnlem: “Mhaka dhorun ravum nakat Hanv ozun Bapa sorxim choddunk nam: Mhojea Bapa ani tumchea Bapa – xim, mhojea Deva ani tumchea Deva-xim, Hanv choddun vetam.” Ani Jezun mhunnlem: “Jednam mhaka zomni velo ubartit, tednam Hanv soglleam mon’xank mhoje-xim oddun haddtolom”.

    Jezuk khursa voir ubharlo mhunnlear Taka Tachea Sorg-Provesan (sorgar choddnnean) voir ubharlo. Jezu Krist, novea ani sasnnik Koraracho ekuch Iadnik: mon’xamnim kel’lea Gabhareant (sanctuary) bhitor sorunk nam: To khorem mhunnlear khud sorgar bhitor sorlo ani oso To atam amche khatir Deva mukhar ubo zalo. (Heb. 9:24) Thoim Krist sodankal Aplem Iadnikponn jieta, karann To tache udexim Devak lagim sorteleam khatir vinonti korunk sodanch jieta. (Heb. 7:25)

    Ieunchim aslim team denneancho Porom – Iadnik koso Krist ailo ani odik vortea and odik sopurnn Tombuntlean Tannem proves kel’lean sorginchea Bapak man ditelea sevadhormacho kendr ani mukhi vaurpi (actor) Challis dis apleam xisank tanchea kamant adhar ani xikvonn dilea uprant Jezu apleam xisam sangata Olivet dongrar veta ani tanche nodre mukhar sorgar choddta.

   Amkam sorga khatir rochleant mhunn Jezucho Sorg-Proves amkam sangta Toxench Tacho Sorg-Proves sorgacho bhorvanso dita. Xekim, sorgar choddtanam Tannem amkam sogllea sonvsarak vochunk ani Bori khobor porgottunk hukum ghatlo. Punorjivont zal’lea ani Sorgar gel’lea Jezuk hat nant, paim nant, tallo nam, adhar nam. Amcho adhar To ravta. Hea sonvsarant ami Tache govai. Jezucho Sorg – Proves amchea xevottacho amkam ugddas korta ani lokank mogall Bapaxim vhorunk ami uzvaddache dive zaunk magta.

    Visver Povitr Atmeachi porob somorombhtanv. Ujeachea jibanchea rupan To Ankvar Mariecher ani Jezuchea xisancher denvta. Povitr Atmeachea dennean ani uzvaddan, tim sogllim uzvaddache dive zaunk pavtat Povitr Atmo jivit dita, ani tankam kalljidarponnan ani denneamnim bhorta. Povitr Atmo Povitr Sobhent asa, oromb Povitr Sobhecho, Povitr Sobheachea vangddeank jivit dinnar ani xisancho ani Kristache Guddarth Kuddicho sangati ani adhari.

   Satavisver ami Povitr Tritechi porob somrombhtanv. Povitr Tritvi Ek. Tin Dev nant punn tin zonnamnim ek Dev. Ekach Devak ani tin veglleam zonnak sotmandanv. Ek-ek zonnanchem kam vegllem. Soglleam tegui zonnank ek dixea, ek margdorxonn ani ek hetu karann te ekuch Dev.

   Ami zaitim: veg-vegllim amchim kamam torni ami ekcharan jieunk zai: he porim, Bhov Povitr Tritvechea ekcharan ami jieunk pavuncheak. Ami sogllim ek zauncheak amche khatir Jezun oxem magnnem kelem: “Tim sogllim ek zaum. Zoxem Tum, Bapa, Mhoje sovem asai ani Hanv Tuje sovem asam toxench tim-i Amche sovem ek zaum ani, he porim, Tunvem mhaka pattoilai mhunn sonvsar bhavarth dhorum”.